Posts

قطع الاثاث و علاقتها بالاطفال

قطع الاثاث و علاقتها بالاطفال
مش هنتكلم فى المقال ده , عن اخر صايحات الموضة فى عالم الديكور و الوان 2017 و هكذا , انا هتكلم عن شىء أهم و أكبر من وجهه نظرى , علاقه فرش البيت بالاطفال !
لو تم دراسه المقاله ديه و وضعها فى الاعتبار وقت الشراء هتوفروا على نفسكم فلوس كتير و هتقلل كتير من المشاكل و الحوادث .
أى اتنين مقبلين على الزواج او حتى حبوا يجيبوا قطعة فرش جديده فى بيتهم دايماً بيستعجلوا و بيبدأوا يشتروا اما فرش عاجبهم شكله و مش هيفيدهم او بيشتروا فرش غير مناسب للمكان و للاستخدام , و عمر محد فكر او جه فى باله يشترى فرش يناسب أستخدام كل افراد الاسره , الى فى الاغلب بتتكون من اب وام و اطفال , و احنا هنا هنعتبر ان الاسره ديه عندها طفلين طفل فى مرحله الحضانه و طفل اخر فى مرحلة المدرسه و مدام احنا بنحدد محددات المقال فأحنا كمان بنتكلم على المساحات الصغيره للفراغات .
أكيد عمر محد قسم الحياه فى مقالة بتتكلم عن اختيار قطع اثاث لفترتين ابدأ  , لكن مع الاطفال التقسيم ده مهم جداً , فتره النهار اللعب و المذاكره و فتره الليل النوم و السهر .
بشكل موازى هنترجم فتره النهار لغرفه المعيشة و السفره و المطبخ و دول اكتر فراغات بتستخدم فى فتره النهار , اما فتره الليل فهتكون لغرفة النةم الرئيسية و غرفة الاطفال , الحمام فراغ مشترك بين الفترتين و رغم انه صغير بس جبار  علشان كده هنتكلم عنه فى مقاله تانية .
فتره النهار :
هنبدا بغرفة المعيشه الى هتكون مكوناتها كالاتى :
• صوفة سرير جلد ذات الوان داكنه ( مش لازم تكون سودا لكن نختار اللون الغامق فى درجات الالوان ممكن يكون زيتى او اورانج او بنى … و هكذا )
طبعاً اختراع الصوفه السرير الجلد من افضل الاختراعات الى ممكن تحصل فى الحياه لان استخدماتها كتيره و تنضيفها سهل جداً و ممكن تشتروا صوفه نوعها جيد من مكان محترم بسعر مناسب وقت التخفيضات, بس أتمنى أنكم تتأكدوا من متانة الجلد لانه هيتنام عليها كتير و فى فتره كل أم عرفاها فتره تعليم الطفل الاستغناء عن البامبرز و خصوصاً بليل , هتعشقوا حاجه اسمها صوفه  , و لازم نتأكد من متانة ارجل الصوفة لانها هتبقى نطاطة فتره حلوه من الحياه 
kivik-three-seat-sofa-and-chaise-longue__0206559_PE360682_S4

• طربيزه خشب أمام الصوفة بدون ادراج او زجاج
انا حبيت انها تكون بسيطة و من غير اى زجاج لانها هيتوقف عليها و الارتفاع عن الارض ميقلش عن 50 سم لان ممكن تبقى لعبة هيستخبى أو يقعد تحتها او يعملوها ممر وقت الجرى و الزحف و ده فى حد ذاتة جميل لانها هتحسسه بحجمة كل ما يكبر شوية .
طبعا انا لغيت فكره الادراج لانه لو طفل شقى شويه هيفتحه و يعمله سلم يطلع بيه على الطربيزه .
abu elnaga _ furniture (1)
• طربيزه صغيره بكرسى صغير لطفل مرحلة المدرسة
مش عارفه ليه عمرنا مفكرنا ندى لطفل المدرسه مكانه حوالينا و نعمله مكان صغير ليهو نحطله شوية الوان و ورق و نقدر نجمعهم فى عليه بلاستيك بعد اللعب و نحطها فوق طربيزته , ده هيساعده كتير و هيحس انه قاعد معاكم و اكيد هيقلل شويه من الزن و الشقاوه.
Bajaj_065_M_1_2x-8b279
• مساحة فاضية للعب طفل مرحلة الحضانة
• مكتبة تليفزيون , طبعا نبعد عن المكتبات المودرن القصيره و اى مكتبات خفيفه و نختار مكتبات عالية متينة و لها ضلف بمفاتيح .
3570f4dp
• ستاره بسيطه ملونه
Untitled-1
على فكره الستاره ديه فى حد ذاتها لعبه و انا رجحت تصميم بسيط جداً ليها لاننا مش هنحتاج اكتر من كده مش لازم براقع و شغل تقيل و كتير و غالى على الفاضى اهم حاجه نتأكد انها متثبتة صح و كويس جداً .

غرفة السفره :
اهم حاجه ارتفاع السفره الى ميزيدش عن 75سم و نبعد عن الطربيزات العاليه و الافضل انكم تقعدوا تجربوها قبل الشراء و تشوفوا هل انتم مستريحين و لا لا .
الافضل ان الطربيزه تكون صغيره و عارفين توصلوا لمعظم الحاجات عليها و تحتها فاضى يعنى ذات 4 ارجل ميبقاش فى شغل تحتها , متنسوش احنا بنتكلم عن 4 افراد عليها , لكن طبعاً ممكن تشترواالنوع المتحرك وهو بيوسع و يضيق لو انتم من الاسر الى بتعمل عزومات كتير و مننساش نبعد عن السفره الدائرية لانها غير مريحه مع الاستخدام .
bjursta-idolf-table-and-chairs-black__0188360_PE341202_S4
افضل شىء لطفل الحضانه انك تشترى كرسى صغير مرن الفتح و القفل و ده بيتركب على الكرسى العادى وهو عملى جداً على فكره لانه خفيف و تقدرى تأخدية معاكى فى اى مكان تانى .

Untitled-112

المطبخ :
اكتر فراغ فيه لعب كتيره و كبيره و كلها ممنوعات و الافضل انك تقفليه و تحاولى تكونى فيه لوحدك ازاى الله اعلم  .
مش عاوزين ننسى ان كل ابواب البيت تكون بتفتح و تقفل بقفل و مفاتيح من الجهتين و ده شىء مهم جداً .
فتره الليل :
نبتدى فيها بغرفه النوم الرئيسية , المفروض تكون خاصه بالوالدين فقط لكن فى بعض الاحيان بتكون هى دى غرفه المعيشة و اللعب و المذاكره و البيت كله  , ولان دى الحاله الاصعب و الاغلب فانا هعتبرها كده فعلاً .
مكونات الغرفه هيكون :
• سرير خشب مقاس لا يقل عن 170 سم
اتمنى اننا نختار مرتبة سوست ارتفاع 15 او 20 سم ( لو قطن جميله برده ) المهم اننا نجربها و نتاكد انها مريحه هى و المخدات الى هتكون فايبر (Medium ) .
طبعأ مش هأكد على الموضوع الراحه و اد ايه دا مهم جداً , و ان لو حصل العكس حياتكم هتبقى جحيم ببساطه !
20134_cosl17a_01_thumb_PE360566
• سرير بيبى ودلوقتى اصبح فى منتجات كتيره مرنه و سهله الاستخدام و الحركه كمان و مش بتاخد مكان , تقدرى تختارى الى ينسبك من حيث راحة الاستخدام و السعر .
The-Culla-Belly-Co-Sleeper-Attaches-onto-Beds-For-Easy-Access-320x300

• دولاب كبير يعنى ميقلش عن 3م و الافضل ان الارتفاع يوصل للسقف ( لان فى الاغلب بتحطوا حاجات على الدولاب و بيبقى شلكه سيء جداً ) و من جوه التقسيم الى يريحكم لكن اهم نقطه ان الادراج الى بداخل الدولاب تكون فى المنصف او فوق مش تحت خالص .
maxresdefault
• التليفزيون الافضل يكون معلق على الحائط و بعيد عن الاطفال تماماً , بدون مكتبة او اى شىء حوالية .
• التسريحة , لو تفتكروا زمان كان فى تسريحة المرايات فيها بتتقفل و كلها ادراج, الموديل ده الافضل و الاكثر عمليه من ناحية الاستخدام و طاقة المكان , انا من الناس الى مش بحب المرايات فى غرف النوم , لكن اعتقد ان الموديل ده هيرضى جميع الاذواق و يناسب الكل , خصواصاً انه كمان حجمها صغير فبتاخد مساحه صغيره .
get-4-2010-cvkg4iz6
• فراغ فاضى كبير بالغرفة مغطى بالكامل بالسجاد ( سجاده خفيفه سهله الشيل و التنضيف ) لان بشكل عام ده هيكون مكان اللعب .
• يفضل دايماً يكون فى جلسة صغيره مجرد كنبة اتنين جلد طبعا زى متفقنا , و طربيزه متعدده الاستخدامات بتقفل و تفتح , علشان وقت متحتجهاش تقدرى تقفليها خالص و تحطيها على جنب .
• الكومود, الافضل يكون له أدراج و ليها مفاتيح زى متفقنا .
• فى ناس كتير بتحب تعمل كورنر صغير لل workshop مفيش مانع طبعاً , المهم بس اننا نختار مكتب صغير جداً او طربيزه بما ان الكل دلوقتى عنده لاب توب .
جينا لغرفه الاطفال :
دى ملك لطفلك و بالتالى لازم تسألية و تسبيه هو الى يختار الالوان و الاشكال و الرسومات اللى بيفضلها و لازم نحط فى اعتبارنا ان الغرفه لازم تستوعبه فى كل مراحل عمره , مينفعش اجيب النهارده سرير بيبى و بكره سرير لطفل و بعده لشاب و هكذا , كظه اهدار للفلوس و لكن ممكن نصمم غرفه اطفال مرنه , يعنى مثلاً النهارده ممكن نعمل سرير كبير و نحط له اشكال و الرسومات الى يفضلها و لما يكبر ممكن كل ده يتشال و يرجع السرير لحالتة الاصلية , نفس الكلام فى الحوائط ممكن النهارده تبقى دهانات و بكره تبقى ورق حائط او النهارده رسومات و بعد كده تتغطى بورق حائط و هكذا .
مكونات غرفه الاطفال :
• سرير خشب لا يقل عن 1 م و طوله لا يقل عن 190 سم ويكون واصل للارض علشان التراب و ممكن طبعاً يكون له ادراج او سندره الى يريحكم اكتر , اهم حاجه المرتبه و المخدات بأكد اختيارهم مريحين للطفل , و مننساش ان الارتفاع الكبير للمرتبة مش كويس أبداً .
• الدولاب لا يقل عن 120 سم عرض و انا بفضل انه يكون للسقف لان لو قصير فاى ام مصرية هتبدأ تحط كراكيب فوقيه ملهاش لزمة , فالافضل نستفاد بالارتفاع ده داخل الدولاب .
• المكتب الافضل يكون صغير و له ادراج .
• لازم ولابد و مهم جداً جداً يكون فى مكتبة ولو صغيره فى هذه الغرفه بالذات و طبعا يكون دولاب جواه الكتب و مقفول عليها لحمايتها من التراب و التقطيع , لازم نهتم بده جداً و لو فى مساحه نعمل كورنر كجلسة للقراءه و الافكار كتيره و جميله له .
a7b7897f94da075cb497360006e393ce
اخر حاجه مننساش حائط الذكريات , الحياه بقت فعلا صعبه جداً و الناس اغلبها تعبت , و من وقت للتانى بنحتاج نفتكر اللحظات و الناس الحلوه الى فى حياتنا.

الخلاصه :
البيت شىء مهم جداً خصوصاً وان كان بداخله اطفال منتظرين قدر من المسؤولية اتجاهم , البيت اكتر مكان بنقضى فيه عمرنا , فالافضل اننا نهتم بيه علشان نحول مجرد جدران طوب لمكان جميل مريح سعيد.

اتمنى تكون هذه التدونية قد أفادت و لو قليلا كل من هو مقبل على شراء اثاث و لديه اطفال
يمكنكم دائماً زياره مدونتى على موقع المكتب www.archimaker.com
او على الفيس بوك https://www.facebook.com/Arch.nerminbaligh/
أخيراً إذا كانت لديكم إي اسئلة أو إستفسارات يمكنم وضعها فى comments اسفل كل مقاله و سأقوم بالاجابه عليها
12-10-2016

مهندسه نيرمين بليغ
مهندس معمارية أعمل فى مجال التصميم المعمارى و الديكور مؤسسه اول مكتب هندسى افتراضى بالشرق الاوسط و العالم منذ 2005 .

Portfolio Items